Анх удаа худалдааны вэбсайт хийлгэхээр судалж буй уншигчдад зориулан бичлээ.
1. Хэрэгцээгээ зөв тодорхойл
Хэрэгцээгээ дараах 3 түвшинд тодорхойлохыг хичээ. Эхлээд нэгийг хийж ашиглалтад оруулсны дараа дараагийн хөгжүүлэлтээ хийгээрэй.
- Худалдааны вэбсайтад заавал байх суурь функцүүд
- Бизнесийнхээ одоогийн үйл ажиллагааг тасалдуулахгүй байхад шаардагдах нэмэлт функц
- Цаашдын зорилгод нийцүүлсэн дараагийн түвшний нэмэлт хөгжүүлэлт
“Нийтлэг гардаг алдаа – Өөрийн хэрэглэдэг дотоод, гадаадын томоохон сайтуудыг хараад гоё санагдсан бүгдийг вэбсайтдаа шингээх гэж оролддог”
Яагаад дээрх дарааллыг санал болгож байгаа вэ?
- Бүгдийг нэг дор хийх нь тухайн төслийг улам нүсэр, төвөгтэй болгож буруу шийдэл гаргах эрсдэл бий болж байдаг
- Анх удаа вэбсайт хийлгэж байгаа хүний хувьд вэбсайт, түүнийг дагаж ажилладаг программуудын талаар мэдлэг, мэдээлэл бага байдаг – суурь функцүүдийг хийх явцад та вэбсайт программ бүтээх процесс, ажиллагааны талаар боломжийн ойлголт авч чадна
- Бага зардлаар, богино хугацаанд эхний хувилбараа ашиглалтад оруулна.
2. Хэнээр хийлгэх вэ?
Юуны түрүүнд шийдвэр гаргах гэж бүү яар. Анх уулзсан газраа шууд битгий сонго. Аль болох олон газар судалж харьцуулалт хий.
Вэбсайтаа код бичдэг хувь хүн, программын компани, вэбсайт бүтээгч платформ ашиглан хийх сонголтууд бий. Бүгд өөр өөрийн давуу, сул талтай.
| Давуу тал | Сул тал | |
| Программын компани | Хариуцлагатай, мэргэжлийн баг, таны хүссэнээр тусгай хөгжүүлэлт, төслийн удирдлага | Зардал өндөр, Хугацаа урт, Нэмэлт хөгжүүлэлт хийх хэцүү – жижиг хөгжүүлэлт ч хугацаа авна. |
| Код бичдэг хувь хүн | Таны хүссэнээр тусгай хөгжүүлэлт, зардал дээр уян хатан ярилцах боломж, шууд харилцаа, хурдан (заримдаа) | Чанарын хувьд 100% найдвартай биш, нөөц бололцоо байхгүй – ганц хүн, урт хугацааны дэмжлэг үзүүлэх боломж эрсдэлтэй, хариуцлагын асуудал |
| Вэбсайт бүтээгч платформ | Хурдан, бага зардлаар эхэлнэ (заримдаа 0 зардлаар), Бэлэн функцүүд, Хэрэглэхэд хялбар, цаашид тэлэх боломжтой функцүүдтэй, хүссэнээрээ цаг алдалгүй өөрчлөлт хийх боломж | Таны хүссэнээр тусгай хөгжүүлэлт хийх боломж хязгаарлагдмал, тасралтгүй төлбөр төлнө |
Вэбсайт бүтээгч платформ гэж юу вэ?
3. User Experience-д илүү анхаар
- Энгийн цэс: Меню, барааны ангилал зэргийг хэрэглэгчид нэг дор хэт олон зүйлийг харуулахгүйгээр хөтлөн цааш зочлуулах боломжтойгоор тооцоолон хий.
- Хялбар төлбөр төлөх функц: Аль болох цөөн алхмаар төлбөр төлөх функцтэй хийгээрэй. Зочноор нэвтрэн худалдан авах сонголтыг байлга.
- Гар утсанд тохиромжтой байдал: Гар утсанд хэрхэн харагдаж байгаа эсэхийг заавал шалга (Mobile responsive). Хэрэглэгчдийн ихэнх нь гар утсаар нэвтэрдэг.
- Вэбсайтын хурд: Хурд муу байх нь хэрэглэгч вэбсайтыг орхих, худалдан авалтын дундаас болих томоохон шалтгаан болдог. Хуудсуудад ашиглаж байгаа зураг оновчтой хэмжээ, өргөтгөлөөр татагдаж байгааг, мөн кодны чанар хурдад муугаар нөлөөлөхүйц эсэхийг шалга.
4. Чанартай барааны зураг, тайлбар
- Чанартай зураг: Барааны зургийг хуудсуудад багтаамж бага эзлэхүйц, зөв хэмжээтэй хөрвүүлж байгаа эсэхийг хянаж, хөгжүүлэгчтэйгээ ярилц. Нягтрал сайтай, барааг олон өнцгөөс нь харуулсан зураг ашигла. Бараагаа сайн илэрхийлж чадах видео оруул.
- Ойлгомжтой тайлбар: Хэрэглэгч худалдан авах шийдвэрээ гаргахад шаардлагатай бүх мэдээллийг товч бөгөөд тодорхой оруул.
Вэбсайтаар бараагаа зарах гэж л байгаа бол хэрэглэгч ердөө энэ 2 мэдээлэл дээр үндэслэн шийдвэрээ гаргаж байгаа гэдгийг бодох хэрэгтэй.
5. Вэбсайт хийхэд цаг гаргаж оролц
Вэбсайт хийх ажлыг программис-д даатгаад орхиж болохгүй. Энэ нь буруу шийдэл гарах, дутуу функцтэй программ бий болох, хугацаа алдах шалтгаан болдог. Мөн буруу гаргасан шийдлийг засах нь зардлыг нэмэгдүүлдэг.
Дүгнэлт
Багаар эхэл – тасралтгүй хөгжүүл – тасралтгүй суралц
Хамгийн чухал, цөөн функцүүдийг багтаасан вэбсайт нь энгийн, ойлгомжтой болохоос гадна бага зардлаар, богино хугацаанд эхлэх боломжыг танд олгоно.
Үргэлжлүүлэн бизнес дээр үүссэн бодит хэрэгцээ, хэрэглэгчээс ирсэн саналд үндэслэн хөгжүүл.
Вэбсайт, программ хөгжүүлэлтэд өөрийгөө тасралтгүй хөгжүүлж зөв шийдлийг тохиромжтой цаг үед нь хөгжүүл.
Маркетшоп платформын онцлог, давуу талын талаар энд дарж уншина уу.